Risalah Kadua tina Mektup Kadua Puluh Salapan
Ngeunaan Ramadan Nu Mulya
[Risalah ieu bakal nyebatkeun sababaraha hikmah ngeunaan Ramadan nu mulya, anu paling caang sareng megah di antara syiar Islam. Ieu “salapan pangajaran lemes” anu ngébréhkeun salapan hikmah tina seueur pisan hikmah Ramadan nu mulya.] ﺑِﺴْﻢِ ﺍﻟﻠّٰﻪِ ﺍﻟﺮَّﺣْﻤٰﻦِ ﺍﻟﺮَّﺣ۪ﻴﻢِ ﺷَﻬْﺮُ ﺭَﻣَﻀَﺎﻥَ ﺍﻟَّﺬ۪ٓﻯ ﺍُﻧْﺰِﻝَ ﻓ۪ﻴﻪِ ﺍﻟْﻘُﺮْﺍٰﻥُ ﻫُﺪًﻯ ﻟِﻠﻨَّﺎﺱِ ﻭَ ﺑَﻴِّﻨَﺎﺕٍ ﻣِﻦَ ﺍﻟْﻬُﺪٰﻯ ﻭَ ﺍﻟْﻔُﺮْﻗَﺎﻥِ PANGAJARAN LEMES KAHIJI: Saum dina Ramadan nu mulya mangrupikeun salah sahiji anu utama dina lima rukun Islam. Éta ogé salah sahiji syiar Islam anu pangageungna. Tah, seueur hikmah saum dina Ramadan nu mulya; aya hikmah anu ningali ka rububiyah Gusti Nu Maha Leres, kahirupan masarakat manusa, kahirupan pribadina, ngasuh nafsu sareng sukur pikeun ni'mat Ilahi. Salah sahiji hikmah tina seueur hikmah saum dina sisi rububiyah Gusti Nu Maha Leres nyaéta: Margi Gusti Nu Maha Leres nyiptakeun beungeut bumi dina wangun hiji méja ni'mat sareng nyusun sadaya jinis ni'mat dina éta méja ku cara ﻣِﻦْ ﺣَﻴْﺚُ لَا ﻳَﺤْﺘَﺴِﺐُ, ku éta kaayaan Mantenna ngébréhkeun kasampurnaan rububiyah, Rahmaniyah sareng Rahimiyah-Na. Di handapeun tabir lalawora sareng dina bunderan sabab-sabab, manusa henteu tiasa ningali sapinuhna hakékat anu diébréhkeun ku éta kaayaan, sakapeung mopohokeun. Ari dina Ramadan nu mulya, jalma-jalma iman dumadakan janten sapertos hiji tentara anu diatur. Ku némbongkeun sikep ubudiyah sapertos ngantosan paréntah "Mangga!" caket ka sonten, dina wangun diondang kana jamuan Gusti Sultan Azali, aranjeunna ngawaler Rahmaniyah anu pinuh ku welas asih, megah sareng ngawengku ku ubudiyah anu lega, agung sareng teratur. Naha manusa anu henteu ilubiung dina ubudiyah anu sakitu luhurna sareng kamulyaan paparin ieu pantes pikeun nami manusa? PANGAJARAN LEMES KADUA: Dina sisi saum Ramadan barokah ningali ka sukur ni'mat Gusti Nu Maha Leres, salah sahiji hikmah tina seueur hikmahna nyaéta: Sakumaha disarioskeun dina Kalimah Kahiji, kadaharan anu dibawa ku tukang baki tina dapur hiji raja nungtut hiji harga. Sanaos tip dipasihkeun ka tukang baki, nganggap ni'mat anu kacida luhur ajénna éta teu aya ajénna sareng henteu wanoh ka anu maparinna mangrupikeun bodo anu pangtungtungna. Kitu ogé Gusti Nu Maha Leres parantos nyebarkeun jinis-jinis ni'mat-Na anu teu aya watesna ka umat manusa di beungeut bumi. Salaku waleranna, Mantenna ngersakeun sukur salaku harga éta ni'mat. Sabab sareng anu gaduh éta ni'mat sacara lahir sapertos tukang baki. Urang masihan hiji harga ka tukang-tukang baki éta, ngahutang budi ka aranjeunna; malah masihan hormat sareng nuhun anu seueur pisan saluhureun anu pantes pikeun aranjeunna. Padahal Gusti Nu Maparin Ni'mat Nu Sajati, ngalangkungan éta ni'mat, pantes pikeun sukur dina darajat anu teu aya watesna saluhureun éta sabab-sabab. Tah, nuhun ka Mantenna aya ku uninga yén éta ni'mat langsung ti Mantenna, ngahargaan ajén éta ni'mat sareng ngaraos kabutuhan diri kana éta ni'mat. Tah, saum dina Ramadan nu mulya mangrupakeun konci sukur anu sajati sareng ihlas, agung sareng umum. Margi dina waktos sanés, lolobana manusa anu henteu aya dina paksaan, nalika henteu ngaraos lapar sajati, henteu tiasa ngartos ajén seueur ni'mat. Hiji sempalan roti garing, pikeun jalma anu wareg, hususna upami beunghar, darajat ni'mat di jerona henteu kahartos. Padahal dina waktos buka saum, daya ngaraosanna janten saksi yén éta roti garing mangrupa ni'mat Ilahi anu kacida luhur ajénna dina pandangan mukmin. Ti raja dugi ka anu pangmiskinna, sadayana dina Ramadan nu mulya nampi sukur maknawi ku ngartos ajén éta ni'mat. Kitu deui, tina sisi dilarang tuang dina beurang, kalayan nyarios "Éta ni'mat sanés milik abdi. Abdi henteu bébas neda ieu; hartosna ieu milik sareng paparin Anu Sanés. Abdi ngantosan paréntah-Na," anjeunna mikawanoh ni'mat salaku ni'mat sareng ngalaksanakeun sukur maknawi. Tah, ku cara ieu, dina seueur sisi saum janten sapertos konci sukur anu mangrupakeun tugas manusa sajati. PANGAJARAN LEMES KATILU: Salah sahiji hikmah tina seueur hikmah saum dina sisi ningali ka kahirupan masarakat manusa nyaéta: Manusa diciptakeun ku cara anu béda-béda dina sisi panghirupan. Dumasar kana éta béda, Gusti Nu Maha Leres nyauran anu beunghar pikeun ngabantosan fakir miskin. Padahal anu beunghar tiasa ngaraos sapinuhna kaayaan nyeri anu matak karunya sareng lapar fakir miskin ku lapar dina saum. Upami henteu aya saum, tiasa aya seueur jalma beunghar anu nyembah nafsu, anu henteu ngartos sakumaha nyerina lapar sareng miskin, sareng sakumaha peryogina aranjeunna kana welas asih. Dina ieu sisi, welas asih ka sasama manusa mangrupikeun hiji dasar sukur sajati. Saha waé individuna, anjeunna tiasa mendakan anu langkung miskin tibatan dirina dina hiji sisi. Anjeunna wajib welas asih ka éta jalma. Upami henteu aya kawajiban ngajantenkeun dirina ngalaman lapar, anjeunna henteu tiasa ngalaksanakeun hadiah sareng bantuan anu wajib dipasihkeun ngalangkungan welas asih; sanaos dilaksanakeun, henteu lengkep. Margi anjeunna henteu ngaraos kaayaan sajati éta dina dirina sorangan. PANGAJARAN LEMES KAOPAT: Salah sahiji hikmah tina seueur hikmah saum dina Ramadan nu mulya dina sisi ngasuh nafsu nyaéta: Nafsu hoyong dirina bébas sareng henteu diwatesanan, sareng nganggap sapertos kitu. Malah sacara fitrah hoyong rububiyah anu disangka sareng ngaléngkah sakahayangna. Éta henteu hoyong mikiran yén diasuh ku ni'mat anu teu aya watesna. Hususna upami gaduh harta sareng kakuatan di dunya, sareng lalawora ogé ngabantosan, éta ngelek ni'mat Ilahi sapertos sato, kalayan leres-leres ngarebut sareng maling. Tah, dina Ramadan nu mulya, ti anu paling beunghar dugi ka anu paling miskin, nafsu sadayana ngartos yén éta sanés anu ngiboga, nanging anu dipiboga; sanés bébas, nanging hamba. Éta ngartos yén upami henteu diparéntahkeun, éta henteu tiasa ngalakukeun hal anu paling biasa sareng paling gampang ogé, henteu tiasa ngulurkeun pananganna kana cai. Ku kituna rububiyah anu disangkana peupeus, éta nyandak ubudiyah sareng lebet kana sukur anu janten tugas sajatina. PANGAJARAN LEMES KALIMA: Salah sahiji hikmah tina seueur hikmah saum Ramadan nu mulya dina poko ningali ka ngabenerkeun ahlak nafsu sareng ngantunkeun lampah anu ngalawan nyaéta: Nafsu manusa mopohokeun dirina ku lalawora. Éta henteu tiasa sareng henteu hoyong ningali henteu daya anu teu aya watesna, kabutuhan anu teu aya tungtungna sareng kakurangan anu kacida ageungna dina hakékatna. Éta ogé henteu mikiran sakumaha lemahna, rawan leungitna sareng janten sasaran musibah, sareng yén éta mung daging sareng tulang anu gancang ruksak sareng paburencay. Saolah-olah gaduh awak waja, sapertos henteu tiasa maot sareng ngabayangkeun dirina langgeng, éta nyerang dunya. Kalayan hawek sareng sarakah anu kuat, sareng patali ogé kanyaah anu kuat, éta ngaluncat kana dunya. Éta kabeungkeut kana sagala hal anu ngeunah sareng mangpaat. Éta ogé mopohokeun Gusti Nu Nyiptakeunana, anu ngasuhna kalayan welas asih anu sampurna. Éta henteu mikiran hasil hirup sareng kahirupan aheratna, tuluy ngaguling dina ahlak goréng. Tah, saum dina Ramadan nu mulya ngajantenkeun anu paling lalawora sareng ngabantah ngaraos kalemahan, henteu daya sareng kabutuhanana. Ngaliwatan lapar, éta mikiran lambungna. Éta ngartos kabutuhan dina lambungna. Éta émut sakumaha gampang ruksakna awakna anu lemah. Éta ngartos sakumaha peryogina kana rohmat sareng welas asih. Ku ngantunkeun fir'aunna nafsu, éta ngaraos kahoyong pikeun nyalindung ka lawang Ilahi kalayan henteu daya sareng kabutuhan anu sampurna, sareng nyiapkeun pikeun ngetrok panto rohmat ku panangan sukur maknawi. Upami lalawora henteu ngaruksak manahna... PANGAJARAN LEMES KAGENEP: Salah sahiji hikmah tina seueur hikmah saum Ramadan nu mulya dina sisi ningali ka turunna Al-Qur'an Al-Hakîm, sareng dina sisi Ramadan nu mulya mangrupikeun waktos turunna Al-Qur'an Al-Hakîm anu pangpentingna, nyaéta: Margi Al-Qur'an Al-Hakîm parantos turun dina sasih Ramadan, pikeun ngingetkeun waktos turunna Al-Qur'an sareng ngabagéakeun kalayan saé éta dawuhan ti langit, dina Ramadan nu mulya manusa misahkeun diri tina kabutuhan nafsu anu hina sareng kaayaan anu henteu aya gunana, ngantunkeun tuang sareng leueut pikeun nyarupaan kaayaan malaikat, sareng ku hiji cara maos sareng ngadangu Al-Qur'an sapertos nembé turun. Anjeunna nampi kaayaan suci sapertos ngadangu dawuhan Ilahi di jerona dina waktos éta turun, sareng ngadangu éta dawuhan sapertos kadangu ti Rosul Nu Mulya (A.S.M.), malah ti Kangjeng Jibril, malah ti Gusti Nu Ngadawuh ti Azali. Sareng anjeunna sorangan ngébréhkeunana, ngajantenkeun batur ngadangu, sareng némbongkeun hikmah turunna Al-Qur'an dina hiji darajat. Leres, dina Ramadan nu mulya saolah-olah alam Islam janten sapertos hiji masjid. Hiji masjid anu jutaan hafiz di juru-juru éta masjid pangageungna ngajantenkeun jalma-jalma bumi ngadangu éta Al-Qur'an, éta dawuhan ti langit. Unggal Ramadan némbongkeun ayat ﺷَﻬْﺮُ ﺭَﻣَﻀَﺎﻥَ ﺍﻟَّﺬ۪ٓﻯ ﺍُﻧْﺰِﻝَ ﻓ۪ﻴﻪِ ﺍﻟْﻘُﺮْﺍٰﻥُ ku cara anu pinuh ku cahya sareng caang. Éta ngabuktikeun yén Ramadan nyaéta sasih Al-Qur'an. Di antara anggota sanés tina jamaah ageung éta, sabagian ngadangu para hafiz kalayan khusyuk. Anu sanés maos sorangan. Dina hiji masjid suci anu kaayaanana sapertos kitu, sakumaha goréngna nuturkeun kahoyong nafsu anu hina sareng ku tuang leueut kaluar tina éta kaayaan nu pinuh ku cahya, sareng sakumaha janten sasaran teu resep maknawi jamaah di éta masjid, kitu ogé anu nentang jalma-jalma saum dina Ramadan nu mulya janten sasaran teu resep maknawi sareng panghinaan sakumna alam Islam dina darajat anu sami. PANGAJARAN LEMES KATUJUH: Salah sahiji hikmah tina seueur hikmah saum Ramadan dina sisi ningali ka panghasilan umat manusa anu sumping ka dunya pikeun melak sareng dagang pikeun aherat nyaéta: Dina Ramadan nu mulya, pahala amal, pikeun hiji janten sarébu. Numutkeun nas hadis, unggal aksara Al-Qur'an Al-Hakîm ngagaduhan sapuluh pahala; kaétang sapuluh kahadéan, mawa sapuluh buah sawarga. Dina Ramadan nu mulya, unggal aksara sanés sapuluh, nanging sarébu; sareng unggal aksara ayat-ayat sapertos Ayat Kursi rébuan, sareng dina dinten Jumaah Ramadan nu mulya langkung seueur. Dina Lailatul Qadar kaétang tilu puluh rébu kahadéan. Leres, Al-Qur'an Al-Hakîm anu unggal aksarana masihan tilu puluh rébu buah langgeng janten sapertos tangkal Tuba nu pinuh ku cahya, anu ngajantenkeun mukmin ngahontal jutaan buah langgeng éta dina Ramadan nu mulya. Tah, mangga sumping; tingali, saksian sareng pikirkeun ieu dagang anu suci, langgeng sareng nguntungkeun, sareng ngartos sakumaha teu aya watesna karugian jalma anu henteu ngahargaan ajén éta aksara! Tah, Ramadan nu mulya saolah-olah hiji paméran sareng pasar anu kacida nguntungkeun pikeun dagang aherat. Éta taneuh anu kacida suburna pikeun hasil aherat. Éta sasih April dina mangsa semi pikeun tumuwuh sareng mekarna amal. Éta sapertos hiji dinten raya anu paling caang sareng suci pikeun parade ubudiyah manusa ka karajaan rububiyah Ilahi. Margi sapertos kitu, manusa dipaparin kawajiban saum supados henteu lebet ku lalawora kana kabutuhan sato nafsu sapertos tuang leueut, sareng kana kahoyong anu henteu aya gunana sareng nyembah hawa nafsu. Saolah-olah, margi samentawis kaluar tina sipat sato kana kaayaan malaikat atanapi lebet kana dagang aherat, ku samentawis ngantunkeun kabutuhan dunya, anjeunna lebet kana kaayaan jalma aherat sareng roh anu muncul dina awak, sarta ku saumna ngalaksanakeun hiji jinis janten eunteung shamadiyah. Leres, Ramadan nu mulya ngawengku sareng ngajantenkeun ngahontal umur anu langgeng sareng kahirupan langgeng anu panjang dina dunya fana ieu, dina umur fana sareng kahirupan anu pondok. Leres, hiji Ramadan tiasa ngajantenkeun ngahontal buah-buah umur dalapan puluh taun. Ku nas Al-Qur'an, Lailatul Qadar langkung saé tibatan sarébu sasih; éta mangrupikeun hujjah pasti pikeun ieu rusiah. Leres, sakumaha hiji raja dina waktos karajaanna, malah unggal taun, ngajantenkeun sababaraha dinten janten dinten raya, atanapi ku nami naék kana tahta, atanapi ku nampi pancaran karajaan anu megah anu sanés, dina dinten éta anjeunna ngajantenkeun rahayatna nampi paparin husus, hadir tanpa tabir, perhatian husus sareng lampah luar biasa, kalayan langsung masihan perhatian husus ka bangsa anu pantes sareng satia, sanés nurutkeun hukum umum. Kitu ogé, Gusti Raja Dzul-Jalâl dalapan welas rébu alam, anu mangrupikeun Sultan azali sareng abadi, parantos nurunkeun dina Ramadan nu mulya Al-Qur'an Al-Hakîm, titah-Na anu luhur anu ningali sareng museur ka dalapan welas rébu alam éta. Tangtos, jantenna éta Ramadan hiji dinten raya Ilahi anu husus, hiji paméran Rabb sareng hiji majelis ruhani mangrupikeun sarat hikmah. Margi Ramadan éta dinten raya, tangtos saum bakal diparéntahkeun pikeun narik manusa dina hiji darajat tina kasibukan hina sareng sato. Saum anu paling lengkep nyaéta: Sapertos lambung, ngajantenkeun sadaya rasa — panon, ceuli, manah, hayalan, pikiran sareng parabot manusa sapertos éta — ngalaksanakeun hiji jinis saum ogé. Hartosna, narik éta tina hal haram sareng hal anu henteu aya gunana, sarta nungtun masing-masing kana ubudiyah anu husus pikeun dirina. Salaku conto, misahkeun létah tina bohong, ghibah sareng ungkara kasar, ngajantenkeun éta saum. Sareng nyibukkeun éta létah ku maca Al-Qur'an, zikir, tasbih, salawat sareng istighfar... Salaku conto, ngahalangan panon ningali ka anu sanés mahram sareng ceuli ngadangu hal goréng, nganggo panon pikeun nyandak pangajaran sareng ceuli pikeun ngadangu kecap leres sareng Al-Qur'an; sareng sapertos kitu, ngajantenkeun parabot sanés ogé ngalaksanakeun hiji jinis saum. Leres, margi lambung mangrupikeun pabrik anu pangageungna, upami ku saum tugasna dieureunkeun, alat-alat gawé alit sanés tiasa gampang dijantenkeun nuturkeun éta. PANGAJARAN LEMES KADALAPAN: Salah sahiji tina seueur hikmah Ramadan anu mulya dina sisi anu patali sareng kahirupan pribadi manusa nyaéta kieu: pikeun manusa, éta mangrupa pantang jasmani sareng maknawi, sajenis ubar anu kacida pentingna, ogé pantang nurutkeun élmu kadokteran. Sabab nalika nafsu manusa tuang sareng leueut sakahayangna, salian ti ngarugikeun kahirupan jasmani jalma éta nurutkeun kadokteran, narajang naon baé anu kapanggih tanpa ngabédakeun halal sareng haram ogé saolah-olah ngaracun kahirupan maknawina. Tuluy nafsu éta ngarasa hésé nurut ka manah sareng roh. Kalayan ngabarontak, anjeunna nyekel kadalina sorangan. Manusa henteu tiasa deui tunggang anjeunna; anjeunna anu nunggang manusa. Dina Ramadan anu mulya, ku jalan saum, anjeunna ngabiasakeun sajenis pantang, narékahan ngalatih nafsu, sareng diajar ngadangukeun paréntah. Anjeunna ogé henteu ngondang panyakit ku ngeusian lambung anu lemah tur matak welas, ku tuang deui saméméh kadaharan saméméhna dicerna. Ku sabab ninggalkeun anu halal lantaran paréntah, anjeunna meunang kamampuh ngadangukeun paréntah tina akal sareng syariat pikeun ngajauhan anu haram. Anjeunna narékahan sangkan henteu ngaruksak kahirupan maknawi. Ogé, seuseueurna pisan manusa sering keuna ku lapar. Lapar anu ngalatih kasabaran sareng katahanan merlukeun latihan nafsu. Saum dina Ramadan anu mulya téh kasabaran sareng katahanan kana mangsa lapar salila lima welas jam, atanapi dua puluh opat jam upami tanpa sahur; éta latihan nafsu sareng latihan diri. Hartina, saum ogé salah sahiji ubar pikeun teu sabar sareng teu tahan anu ngalipatduakeun musibah manusa. Ogé, pabrik lambung éta ngagaduhan seueur palayan. Seueur ogé pakakas manusa anu patali sareng éta. Upami nafsu henteu eureun samentawis tina padamelanana salila beurang dina sabulan, anjeunna ngalantarankeun palayan pabrik sareng pakakas éta mopohokeun ibadah hususna, ngasibukkeun aranjeunna ku dirina, sareng nempatkeun aranjeunna dina kakawasaanana. Ku ramé sareng haseup tina roda-roda pabrik maknawi éta, anjeunna ogé ngabingungkeun pakakas manusa anu sanés. Anjeunna terus narik panitén aranjeunna ka dirina sareng ngalantarankeun aranjeunna mopohokeun tugas luhur samentawis. Ku sabab éta, ti baheula seueur wali anu ngabiasakeun diri kana latihan nafsu, sakedik tuang sareng leueut, pikeun ngahontal kasampurnaan. Nanging, ku saum Ramadan anu mulya, palayan pabrik éta ngartos yén aranjeunna henteu diciptakeun ngan pikeun pabrik éta. Pakakas anu sanés, gaganti kasenangan handap pabrik éta, dina Ramadan anu mulya ngaraos nikmat tina kasenangan anu kawas malaikat sareng anu ruhani, bari neuteup ka dinya. Ku sabab éta, dina Ramadan anu mulya, jalma-jalma mu'min, nurutkeun darajatna, masing-masing nampi rupa-rupa cahya, fayz, sareng kabagjaan maknawi. Dina bulan anu pinuh ku barokah éta, ku jalan saum, unsur-unsur lemes sapertos manah, roh, akal, sareng sirr seueur naék darajat sareng nampi fayz. Sanaos lambung ceurik, aranjeunna seuri kalayan polos. PANGAJARAN LEMES KASALAPAN: Salah sahiji hikmah saum Ramadan anu mulya, dina sisi anu langsung ngarempak anggapan nafsu yén dirina téh pangurus sareng ngawasa, sareng ngabéjaan ubudiyahna ku némbongkeun teu mampuhna, nyaéta kieu: Nafsu henteu hoyong wanoh ka Rabb-na; kawas Fir'aun, anjeunna miharep kakawasaan sareng pangurusan pikeun dirina. Sanaos sabaraha waé azab anu ditimpakeun, akar sipat éta tetep aya dina dirina. Nanging, ku lapar, akar sipat éta dirempak. Nya saum dina Ramadan anu mulya langsung nyerang sareng ngarempak sisi Fir'aun dina nafsu. Éta némbongkeun teu mampuhna, kalemahanana, sareng butuhna, ogé ngawartoskeun yén anjeunna téh hamba. Dina riwayat-riwayat hadis aya yén Alloh Nu Maha Haq ngadawuh ka nafsu: “Kami téh saha, anjeun téh saha?” Nafsu ngawaler: “Abdi téh abdi, Gusti téh Gusti!” Mantenna maparin azab, ngalebetkeun anjeunna ka naraka, teras naros deui. Anjeunna ngawaler deui: “Anâ anâ, anta anta.” Azab naon baé anu ditimpakeun, anjeunna henteu ninggalkeun rasa ngagungkeun diri. Teras Mantenna maparin azab ku lapar, nyaéta ngalaparankeun anjeunna. Mantenna naros deui: “Man anâ wa mâ anta?” Nafsu ngawaler: ﺍَﻧْﺖَ ﺭَﺑِّﻰ ﺍﻟﺮَّﺣ۪ﻴﻢُ ﻭَﺍَﻧَﺎ ﻋَﺒْﺪُﻙَ ﺍﻟْﻌَﺎﺟِﺰُ Nyaéta, “Gusti téh Rabb Nu Rahîm abdi, abdi téh hamba Gusti anu teu mampuh.” ﺍَﻟﻠّٰﻬُﻢَّ ﺻَﻞِّ ﻭَﺳَﻠِّﻢْ ﻋَﻠٰﻰ ﺳَﻴِّﺪِﻧَﺎ ﻣُﺤَﻤَّﺪٍ صَلَاةً ﺗَﻜُﻮﻥُ ﻟَﻚَ ﺭِﺿَٓﺎﺀً ﻭَ ﻟِﺤَﻘِّﻪِ ﺍَﺩَٓﺍﺀً ﺑِﻌَﺪَﺩِ ﺛَﻮَﺍﺏِ ﻗِﺮَٓﺍﺋَﺔِ ﺣُﺮُﻭﻑِ ﺍﻟْﻘُﺮْﺍٰﻥِ ﻓ۪ﻰ ﺷَﻬْﺮِ ﺭَﻣَﻀَﺎﻥَ ﻭَ ﻋَﻠٰﻰ ﺍٰﻟِﻪِ ﻭَ ﺻَﺤْﺒِﻪِ ﻭَ ﺳَﻠِّﻢْ ﺳُﺒْﺤَﺎﻥَ ﺭَﺑِّﻚَ ﺭَﺏِّ ﺍﻟْﻌِﺰَّﺓِ ﻋَﻤَّﺎ ﻳَﺼِﻔُﻮﻥَ ٭ وَسَلَامٌ ﻋَﻠَﻰ ﺍﻟْﻤُﺮْﺳَﻠ۪ﻴﻦَ ٭ ﻭَ ﺍﻟْﺤَﻤْﺪُ ﻟِﻠّٰﻪِ ﺭَﺏِّ ﺍﻟْﻌَﺎﻟَﻤ۪ﻴﻦَ ﺍٰﻣ۪ﻴﻦَ
Nyuhunkeun panghapunten: Ku sabab bagian kadua ieu ditulis kalayan gancang dina opat puluh menit, sareng abdi katut juru tulis anu nyerat draf, duanana nuju gering, tangtos di jerona bakal aya anu teu puguh sareng kakirangan. Urang ngaharepkeun dulur-dulur urang ningali kalayan hampura. Anu dianggap merenah ku aranjeunna tiasa dilereskeun.
--